蔣發太ê故事

Home
蔣發太ê故事

蔣發太ê故事

送完人生上尾一張批

伊已經完成責任，送完人生上尾一張批，kā幸福留hō͘ 收批ê人。
伊就是「蔣發太」，公元1937年9月初3（咱人舊曆7月29）tī高雄市岡山區「後紅里」出世。伊ê老爸「蔣化」，老母「余纏」，lóng是在地古意ê做穡人。因為細漢ê時家庭散赤，蔣發太初中出業了就去食頭路kā厝內tàu-saⁿ-kāng。伊代先tī郵局做臨時郵務差；後來，憑伊家己ê打拚kap進修，一路ùi郵務差、郵務士、郵務佐、郵務員升到支局長退休。
蔣發太tī 25歲ê時hām來自「五甲尾」ê牽手「孫玉枝」結連理。In二人儉腸neh肚，chhiâⁿ養5个囡仔「蔣榮欽」、「蔣榮福」、「蔣榮豐」、「蔣為志」、「蔣為文」大漢。伊37歲ê時，為tio̍h ke收入thang補貼厝內ê開銷，伊志願到戰地金門ê郵局服務2冬。到kah 40歲，蔣發太hām孫玉枝khiām tio̍h頭一隻金雞母，chiah搬來岡燕路ê新厝tòa。Tī hia，in翁仔某發揮台灣人搰力koh giám-ngē ê精神teh經營「五龍發米店」。雖罔艱苦，in喙齒筋咬leh mā teh ǹg-bāng囝兒有出脫、對社會有貢獻。總算，in kā囝兒栽培到醫生、藥師hām教授。60歲ùi郵局退休了，蔣發太秉持「發太打拚代代樂、玉枝搰力事事安」ê信念協助囝兒創立「蔣榮福診所」hām「樂安病院」。擔任樂安病院董事長期間，伊樂善好施，設立「蔣化余纏獎學金」鼓勵學生囡仔讀冊、贊助台語推廣hām台越交流活動等。
替人送批是蔣發太ê第一个頭路mā是伊人生上尾ê責任。Hō͘人真毋甘，伊tī 2017年11月13（舊曆9月25）已經送完手頭上尾一張批。Hit張批是beh hō͘ 伊疼惜ê囝兒序細hām親chiâⁿ朋友，批內kan-taⁿ 2字：「幸福」。